ଯାଜପୁରରେ ମହାସମାରୋହରେ ପାଳିତ ହେବ ‘ଘରେ ଘରେ ତ୍ରିରଙ୍ଗା’ ଏବଂ ‘ବିଭାଜନ ବିଭୀଷିକା ସ୍ମୃତି ଦିବସ’: ପ୍ରସ୍ତୁତି ନେଇ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ**
**ଯାଜପୁରରେ ମହାସମାରୋହରେ ପାଳିତ ହେବ ‘ଘରେ ଘରେ ତ୍ରିରଙ୍ଗା’ ଏବଂ ‘ବିଭାଜନ ବିଭୀଷିକା ସ୍ମୃତି ଦିବସ’: ପ୍ରସ୍ତୁତି ନେଇ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ**
**ଯାଜପୁର, ୭ ଅଗଷ୍ଟ(ଓମ ମିଡ଼ିଆ :ସରୋଜ କୁମାର ଧଳ)
ଆସନ୍ତା ସ୍ୱାଧୀନତା ଦିବସ ତଥା ଜାତୀୟ ସଙ୍ଗୀତ ‘ବନ୍ଦେ ମାତରମ୍’ର ୧୫୦ ତମ ବର୍ଷପୂର୍ତ୍ତି ଅବସରରେ ଯାଜପୁର ଜିଲ୍ଲାରେ ଦେଶପ୍ରେମର ଅପୂର୍ବ ଝଲକ ଦେଖିବାକୁ ମିଳିବ। ଜିଲ୍ଲାବ୍ୟାପୀ ଆସନ୍ତା ୯ ରୁ ୧୭ ଅଗଷ୍ଟ ପର୍ଯ୍ୟନ୍ତ “ଘରେ ଘରେ ତ୍ରିରଙ୍ଗା-୨୦୨୬” ଅଭିଯାନ ଏବଂ ୧୪ ଅଗଷ୍ଟରେ “ବିଭାଜନ ବିଭୀଷିକା ସ୍ମୃତି ଦିବସ” କୁ ବ୍ୟାପକ ଭାବେ ପାଳନ କରାଯିବ। ଏହି ମହାନ ଜାତୀୟ କାର୍ଯ୍ୟକ୍ରମର ସଫଳ ରୂପାୟନ ତଥା ସୁପରିଚାଳନା ନିମନ୍ତେ ଆଜି ଯାଜପୁର ଜିଲ୍ଲାପାଳଙ୍କ ଅଧ୍ୟକ୍ଷତାରେ ଏକ ଗୁରୁତ୍ୱପୂର୍ଣ୍ଣ ଆଭାସୀ ବୈଠକ ଅନୁଷ୍ଠିତ ହୋଇଯାଇଛି। ବୈଠକରେ ଜିଲ୍ଲା ଓ ବ୍ଲକ୍ ସ୍ତରରେ ନିଆଯିବାକୁ ଥିବା ପଦକ୍ଷେପଗୁଡ଼ିକର ବିସ୍ତୃତ ରୂପରେଖ ପ୍ରସ୍ତୁତ କରାଯାଇଛି।
ଚଳିତ ବର୍ଷ ଜିଲ୍ଲାରେ ମୋଟ ୩ ଲକ୍ଷ ୬୦ ହଜାର ଜାତୀୟ ପତାକା ଉତ୍ତୋଳନ ଓ ବଣ୍ଟନ ନିମନ୍ତେ ଲକ୍ଷ୍ୟ ଧାର୍ଯ୍ୟ କରାଯାଇଛି। ମିଶନ ଶକ୍ତି ବିଭାଗର ସ୍ୱୟଂ ସହାୟକ ଗୋଷ୍ଠୀ (WSHG) ମାନଙ୍କ ଦ୍ୱାରା ପ୍ରସ୍ତୁତ ହୋଇଥିବା ଏହି ପତାକାଗୁଡ଼ିକୁ ମୁଖ୍ୟ ଉନ୍ନୟନ ଅଧିକାରୀ , ଜିଲ୍ଲା ପ୍ରକଳ୍ପ ସଂଯୋଜକ (ମିଶନ ଶକ୍ତି) ଏବଂ ଜିଲ୍ଲା ସମାଜ ମଙ୍ଗଳ ଅଧିକାରୀ ଙ୍କ ତତ୍ତ୍ୱାବଧାନରେ ସମସ୍ତ ବ୍ଲକ୍ ଓ ପୌରାଞ୍ଚଳକୁ ଯୋଗାଇ ଦିଆଯିବ। ଆସନ୍ତା ୯ ତାରିଖରୁ ବିଡିଓ, ତହସିଲଦାର ଓ ପଞ୍ଚାୟତ ପ୍ରତିନିଧିମାନଙ୍କ ଜରିଆରେ ଗାଁ ଗାଁରେ ଏବଂ ବଜାର କମିଟି ମାଧ୍ୟମରେ ପତାକା ବଣ୍ଟନ କରାଯିବ। ଏଥିସହ ‘ଫ୍ଲାଗ୍ କୋଡ୍ ଅଫ୍ ଇଣ୍ଡିଆ’ ଅନୁଯାୟୀ ପତାକାର ସଠିକ୍ ବ୍ୟବହାର ଓ ସମ୍ମାନ ରକ୍ଷା କରିବା ନେଇ ଲୋକଙ୍କୁ ସଚେତନ କରାଯିବ।
ଯୁବପିଢ଼ିଙ୍କ ମଧ୍ୟରେ ଦେଶଭକ୍ତି ଜାଗ୍ରତ କରିବା ଉଦ୍ଦେଶ୍ୟରେ ୧୪ ଅଗଷ୍ଟ ସକାଳେ ଜିଲ୍ଲା ସଦର ମହକୁମାରେ ଏକ ‘ମେଗା ତ୍ରିରଙ୍ଗା ରାଲି’ ଅନୁଷ୍ଠିତ ହେବ, ଯେଉଁଥିରେ ପ୍ରାୟ ୩,୦୦୦ ରୁ ୪,୦୦୦ ନାଗରିକ ଅଂଶଗ୍ରହଣ କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଅଛି। ଏହା ବ୍ୟତୀତ ସମସ୍ତ ବ୍ଲକ୍ ଓ ପୌରାଞ୍ଚଳରେ ସ୍ଥାନୀୟ ବିଡିଓ ଏବଂ ତହସିଲଦାରମାନଙ୍କ ନେତୃତ୍ୱରେ ସାଇକେଲ, ବାଇକ୍ ଏବଂ ପଦଯାତ୍ରା ରାଲି ଆୟୋଜନ କରାଯିବ। ମେଗା ରାଲିରେ ସ୍କୁଲ ଓ କଲେଜ ଛାତ୍ରଛାତ୍ରୀ, ଏନ.ସି.ସି (NCC) କ୍ୟାଡେଟ୍, ଏନ.ଏସ.ଏସ (NSS) ସ୍ୱେଚ୍ଛାସେବୀ ଏବଂ କ୍ରୀଡ଼ା ଛାତ୍ରାବାସର ଅନ୍ତେବାସୀମାନେ ବ୍ୟାପକ ସଂଖ୍ୟାରେ ସାମିଲ ହେବା ପାଇଁ ବୈଠକରେ ନିଷ୍ପତ୍ତି ନିଆଯାଇଛି। ଏହି ବିଶାଳ ରାଲିର ଟ୍ରାଫିକ୍ ଓ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବାକୁ ନିର୍ଦ୍ଦେଶ ଦିଆଯାଇଅଛି।
ଛାତ୍ରଛାତ୍ରୀଙ୍କ ମଧ୍ୟରେ ଜାତୀୟତାବୋଧ ବୃଦ୍ଧି ପାଇଁ ଶିକ୍ଷାନୁଷ୍ଠାନଗୁଡ଼ିକରେ ବ୍ୟାପକ ପ୍ରସ୍ତୁତି କରାଯାଇଛି। ସବୁ ସ୍କୁଲ ଓ କଲେଜରେ ‘ବନ୍ଦେ ମାତରମ୍’ ଓ ଜାତୀୟ ସଙ୍ଗୀତ ଗାନ କରାଯିବ। ଏଥିପାଇଁ ଅତିରିକ୍ତ ଜିଲ୍ଲାପାଳ ଓ ଉପ-ଜିଲ୍ଲାପାଳ ଜିଲ୍ଲାର ସମସ୍ତ ମହାବିଦ୍ୟାଳୟର ଅଧ୍ୟକ୍ଷମାନଙ୍କ ସହ ସ୍ୱତନ୍ତ୍ର ଆଲୋଚନା କରି MyGov ପୋର୍ଟାଲ୍ କୁଇଜ୍ରେ ଛାତ୍ରଛାତ୍ରୀଙ୍କ ଅଂଶଗ୍ରହଣ ସୁନିଶ୍ଚିତ କରିବେ।
ଭାରତ ବିଭାଜନ ସମୟରେ ପ୍ରାଣ ହରାଇଥିବା ଏବଂ ସର୍ବସ୍ୱାନ୍ତ ହୋଇଥିବା ଲୋକଙ୍କ ସ୍ମୃତିରେ ଅଗଷ୍ଟ ୧୪ ତାରିଖରେ ‘ବିଭାଜନ ବିଭୀଷିକା ସ୍ମୃତି ଦିବସ’ ପାଳନ କରାଯିବ। ଏହି ଅବସରରେ ଦିନ ୧୧:୦୦ ଘଟିକା ସମୟରେ ଜିଲ୍ଲାର ସମସ୍ତ ସରକାରୀ କାର୍ଯ୍ୟାଳୟରେ ଏକକାଳୀନ ୨ ମିନିଟ୍ ନୀରବ ପ୍ରାର୍ଥନା କରାଯିବ। ସମସ୍ତ ବ୍ଲକ୍ ଓ ମହକୁମା ସ୍ତରରେ ଶ୍ୱେତ ପୁଷ୍ପ ଦ୍ୱାରା ମହାପୁରୁଷ ଓ ସ୍ୱାଧୀନତା ସଂଗ୍ରାମୀଙ୍କ ପ୍ରତିମୂର୍ତ୍ତିଗୁଡ଼ିକୁ ସଜ୍ଜିତ କରାଯାଇ ମାଲ୍ୟାର୍ପଣ କରାଯିବ।
ଏତଦ୍ ବ୍ୟତୀତ ଜିଲ୍ଲା ସଦର ମହକୁମାରେ ସ୍ୱତନ୍ତ୍ର ଫଟୋ ପ୍ରଦର୍ଶନୀ, ପ୍ରାମାଣିକ ଚଳଚ୍ଚିତ୍ର ପ୍ରଦର୍ଶନ ଏବଂ ବିଭାଜନ ଯନ୍ତ୍ରଣା ଉପରେ ଏକ ମର୍ମସ୍ପର୍ଶୀ ନାଟକb ପରିବେଷଣ କରାଯିବ। ସନ୍ଧ୍ୟାରେ ସମସ୍ତ ବ୍ଲକରେ ନୀରବ କ୍ୟାଣ୍ଡେଲ ଶୋଭାଯାତ୍ରା କରାଯିବ ଏବଂ ୧୫ ଅଗଷ୍ଟ ସନ୍ଧ୍ୟାରେ ସଂସ୍କୃତି ଭବନ ଠାରେ ଦେଶାତ୍ମବୋଧକ ‘ତ୍ରିରଙ୍ଗା କନସର୍ଟ’ ଅନୁଷ୍ଠିତ ହେବ।
ସମସ୍ତ ସରକାରୀ କୋଠା, ସେତୁ, ଏବଂ ପ୍ରମୁଖ ଛକଗୁଡ଼ିକୁ ତ୍ରିରଙ୍ଗା ଆଲୋକମାଳାରେ ସୁସଜ୍ଜିତ କରାଯିବ। ଡିଜିଟାଲ୍ ମାଧ୍ୟମରେ ନାଗରିକମାନଙ୍କୁ ପୋର୍ଟାଲରେ "Selfie with Tiranga" ଅପଲୋଡ୍ କରିବା ପାଇଁ ଉତ୍ସାହିତ କରାଯିବ ଏବଂ ଜିଲ୍ଲା ସୂଚନା ଓ ଲୋକସମ୍ପର୍କ ବିଭାଗ ସୋସିଆଲ ମିଡିଆ ମାଧ୍ୟମରେ ଏହି କାର୍ଯ୍ୟକ୍ରମର ବ୍ୟାପକ ପ୍ରସାର କରିବେ।
ଏହି ଅବସରରେ ଜିଲ୍ଲାପାଳ ଯାଜପୁରବାସୀଙ୍କୁ ଏକାନ୍ତ ନିବେଦନ କରିଛନ୍ତି ଯେ, "ଘରେ ଘରେ ତ୍ରିରଙ୍ଗା" କେବଳ ଏକ ସରକାରୀ କାର୍ଯ୍ୟକ୍ରମ ନୁହେଁ, ଏହା ପ୍ରତ୍ୟେକ ଭାରତୀୟଙ୍କ ଗର୍ବ ଏବଂ ଗୌରବର ପ୍ରତୀକ। ତେଣୁ ଜିଲ୍ଲାର ପ୍ରତ୍ୟେକ ନାଗରିକ, ଛାତ୍ରଛାତ୍ରୀ, ଯୁବଗୋଷ୍ଠୀ, ବ୍ୟବସାୟୀ ଏବଂ ସ୍ୱେଚ୍ଛାସେବୀ ସଂଗଠନ ନିଜ ନିଜ ବାସଭବନ ଓ ପ୍ରତିଷ୍ଠାନରେ ଜାତୀୟ ପତାକା ଉତ୍ତୋଳନ କରି ଏହି ଜାତୀୟ ମହୋତ୍ସବରେ ବ୍ୟାପକ ସଂଖ୍ୟାରେ ସାମିଲ ହୁଅନ୍ତୁ ଏବଂ ଦେଶପ୍ରେମର ଅପୂର୍ବ ନିଦର୍ଶନ ସୃଷ୍ଟି କରନ୍ତୁ।
ଆଜିର ଏହି ଭର୍ଚୁଆଲ୍ ବୈଠକରେ ଜିଲ୍ଲାପାଳଙ୍କ ସମେତ ଅତିରିକ୍ତ ଜିଲ୍ଲାପାଳ,ଯୁଧିଷ୍ଠିର ନାଏକ , ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ, ଦେବୀପ୍ରସାଦ ମହାନ୍ତି ,ଉପଜିଲ୍ଲାପାଳ,ତାପସ ରଞ୍ଜନ ଦେହୁରୀ,ଜିଲ୍ଲା ସଂସ୍କୃତି ଅଧିକାରୀ, ଜିଲ୍ଲା ଶିକ୍ଷା ଅଧିକାରୀ, ସମସ୍ତ ବ୍ଲକର ବିଡିଓ ଏବଂ ବିଭିନ୍ନ ବିଭାଗର ପଦାଧିକାରୀମାନେ ଉପସ୍ଥିତ ଥିଲେ।
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0
